中環出更：歌王遇上大師 琴胡和鳴
早前慘遇電話騙案的國家級二胡大師王國潼及其兒子王憓，上周五喺大會堂開音樂會，名為《胡弓琴緣》。其中一個亮點，就係有「AO歌王」之稱嘅民政事務局前常任秘書長楊立門再次同王憓合作多首曲目，包括《這一點愛》、《寒冷的人》、《琴緣》及《留香恨》。楊立門坦言，佢唔係專業，同兩位大師合作，壓力都幾大o架！
楊立門話，二胡嘅特色係簡單同好有感情，而唱中樂同唱流行曲好唔同，中樂較着重咬字，又要熟悉二胡嘅節奏，今次王憓嘅曲目音域較寬，遇到好高音嘅地方，如果太鬆弛咁唱就會唱唔出，所以有時候都幾難控制。王國潼嘅歌唱家太太李遠榕就即時教路，叫楊立門放心唱，唔使咁大力，如果過度激動，聲音就無咁靚，「收一點反而好」。
李遠榕「跟得夫人」做指導
原來李遠榕係「跟得夫人」，每次王國潼演出都會隨行，仲話覺得丈夫表現愈來愈好，但佢都有提到，丈夫同楊立門一樣，有時都會表現得特別激動，佢會加以提點，而兒子王憓就恰到好處喇。不過，當兩父子合作時，顧及王憓無父親咁大力，就要「調一下」，但佢都大讚三人合作得好好。
講番音樂會，今次有份合作嘅，仲包括寫過多首電視劇主題曲嘅作曲家張家誠，原來佢寫流行曲前，寫咗純音樂多年。今次作咗首《雲和月》，佢都話同流行曲嘅做法唔同，流行曲主角係歌手，而今次嘅作品就着重二胡、中胡及鋼琴嘅配合，曲目最困難嘅地方係意境，但兩位王先生都好專業，能夠拉出氣勢，所以合作非常順利。
卓妮