英國詩人多恩講過︰「沒有人是孤島，每個人都是大陸的一部分……不要問喪鐘為誰而敲，喪鐘為你我而敲。」人蛇大軍禍港殃民，咪以為淨係小市民受害，前線執法人員一樣冇好日子過！
有入境處人員爆料，話位於青山灣嘅入境事務中心已經被免遣返聲請者「攻陷」，原本四百個羈留宿位塞咗足足四百五十人，呢班大帝分黨分派，今日「越南幫」火併「孟加拉黨」，聽日「印度派」惡戰「巴基斯坦組」，前線人員疲於奔命。本來入境處人員每年四次接受懲教署防暴訓練，點知好衰唔衰，假難民近年逼爆監獄，懲教署分身不暇，冇法子唔暫停防暴訓練，訓練不足再加上裝備不足，一旦假難民作反，隨時爆大鑊都似！
有立法會議員就講得啱嘞，港府後知後覺，問題積重難返，假難民由偷渡來港、聲請、犯案、打黑工以至被捕入獄，每個環節都超負荷，入境處、懲教署同警隊統統都係受害者。最離譜嘅係，家陣水浸眼眉，香港就嚟陸沉，港府仲係愛理不理，前線執法人員要硬件冇硬件，要軟件冇軟件，唔怪得士氣低落，亂象叢生喇！
點講都好，再咁落去始終唔係辦法，港府早前建議修例，擴大「未獲授權進境者」嘅定義，涵蓋香港人蛇嘅十個主要來源地，加重對蛇頭罰則。點知道高一尺，魔高一丈，蛇頭立即變陣，將人蛇送到香港附近海域後溜之大吉，結果一樣冇佢哋符，難為官老爺仲一味死撐，話任何人只要參與運送人蛇，執法部門就可以跟進，舉證反而易咗喎，呃鬼食豆腐咩。
與其揚湯止沸，不如釜底抽薪。法例上小修小補係冇用嘅，直接退出聯合國《禁止酷刑公約》，咁咪一了百了咯。有辦你睇，新加坡唔係《禁止酷刑公約》簽署國，對付假難民手起刀落，即捕即解，甚至唔畀佢哋落船都仲得。點解新加坡做得到，香港做唔到？
再講吖，我哋嘅祖國夠係《禁止酷刑公約》簽署國喇，咪又係可以短時間內遣返人蛇，可見事在人為嘅啫。真係諗極都唔明，港府假仁假義，沽名釣譽，唔通咁就係一國兩制、港人治港？對假難民講人權，咁香港七百萬市民慘遭蹂躪，佢哋嘅人權邊個保護？退一萬步講，即使退出公約唔係一時三刻做得到，最起碼都應該設立禁閉式難民營，反正以前都係咁處理越南船民問題嘅喇，當年港英政府搞得掂，冇理由今日特區政府搞唔掂啩？
農夫與蛇嘅故事大家耳熟能詳，港產官僚繼續對假難民問題無知無覺無神經，坐以待斃，喪鐘遲早為佢哋而敲嘅咋！