食水含鉛超標調查委員會早前發表報告，結論係政府部門喺鉛水事件上集體失職，但係時至今日都未有官員需要為失職問責下台。立法會議員梁美芬尋日就帶埋四十多名受鉛水影響嘅街坊，遊行去政府總部，向特首辦代表遞交請願信。梁美芬要求政府承擔責任，除咗水務署署長林天星要負責之外，如果涉及運輸及房屋局失職，局長張炳良都要問責下台！連本身係建制派嘅梁美芬都追究官員鉛水責任，相信政府絕對唔可以口噏噏話負責就當了咗件事，一日未有滿意嘅交代，相信受影響居民都會窮追猛打！
