政情：馬恩國發晦氣 承認「冇政治前途」
外號「粗口大狀」嘅馬恩國，佢擔任主席嘅中澳法學交流基金會（基金會）早前組團訪京醜聞連連，先有佢被指錯誤引述基本法委員會副主任張榮順，指中央處理港獨「要槍有槍，要炮有炮」，其後更爆出基金會兩名男團員夜蒲攬女兼臉貼臉合照，導致基本法委員會委員譚惠珠同立法會議員梁美芬都紛紛跳船，辭去基金會職務。直至尋日，馬恩國仍堅拒道歉，承認向來無政治前途可言，令人感覺佢喺度發晦氣。
馬恩國尋日出席城市大學一個活動時，被問到有冇向譚惠珠同梁美芬道歉，佢就話「我諗道歉嘅唔係我囉，道歉嘅已經道歉咗，就係阿佘（英輝）律師同阿翁（繼文）博士囉！」佢承認，事件對譚惠珠及梁美芬嘅聲譽有影響，特別二人係女士，團員唔應該有夜蒲嘅行為，但認為不能過分責難佘、翁二人，因為事發時係自由活動時間。
自言夜蒲事件監管不力
不過，係咪自由活動時間就可以做任何事不受約束呢？馬恩國承認自己監管得唔好，「大家都係成年人，唔係中學生，我唔能夠廿四小時喺酒店房睇實佢哋做咩，勸佢哋『嗱，呢啲地方唔好去啦』」。佢又稱，知道涉事者「好玩」，但無過問團員夜晚去邊，形容「咁大個人，佢哋應該知自己嘅行為囉！」
馬恩國又被問到有指醜聞令佢嘅政治前途玩完，佢就回應話：「我覺得我自己本身就冇乜嘢政治前途，我亦無可談及玩完唔玩完嘅。」又指唔會猜疑失去譚惠珠同梁美芬兩位顧問，對未來訪京就無法約見同等級數嘅官員，因為基金會仍在運作，唔少高級顧問同榮譽顧問等人仍然留低，認為國家及中央部委仍希望與香港法律界接觸。
基金會名譽掃地陷谷底
佢強調，下次再辦訪京團時，會給予清晰指引，例如加入消夜活動，畀團員去適合地方，以及利用聚會時間再討論翌日嘅議題，預計下年仍會舉辦訪京團。不過，基金會聲譽已跌到落谷底，正如馬恩國自嘲「無乜政治前途」可言，即使能夠再辦訪京團，內地重要部門及官員會唔會接待都成為疑問。