中環出更：港大校友聚首談今昔
沙田馬場尋日舉行香港大學校友會盃賽日，除咗港大校長馬斐森及醫學院院長梁卓偉外，一班名人校友都有到場湊熱鬧。卓妮見到港鐵主席馬時亨大女馬露明（Christine）腹大便便撐場，佢話BB仲有一個月左右就出世喇，但佢一啲都唔緊張，事關佢老公劉仲恒（Kevin）係醫生，已經幫佢做好晒準備迎接新生命來臨，得閒仲會喺屋企用超聲波儀器幫佢照吓個肚，難怪佢咁啖定喇。
話說當年Kevin喺港大讀醫，話當年考入港大唔算好難，但入到去就讀得好辛苦，試過廿四小時喺圖書館打躉，雖然有時會恰着咗，但都係好勤力，仲話溫習同做運動兩者輪流進行，效率及專注力都會高啲！講起佢曾經係梁卓偉學生，呢日梁卓偉見到徒弟就嚟「升呢」做爸爸都好開心，仲希望Kevin個仔都可以做佢徒孫添！而細個讀國際學校的Christine就話希望兒子讀傳統學校先，咁佢就可以同個仔一齊學好中文喇。
葉澍堃「過馬路」入學
同場仲有馬會大董葉澍堃、標準工時委員會主席梁智鴻及太太梁馮令儀、港大首席副校長譚廣亨、百仁基金副主席陳寧寧及羅詠詩等。問到身為港大校友嘅葉澍堃當年考入港大難唔難，佢就笑笑口話：「過條馬路就係，好容易！」皆因佢中學就係港大對面馬路的聖保羅書院，認真幽默。
羅詠詩同陳寧寧呢日就好有默契咁一齊着咗粉紅色衫現身，講起早前有食物中毒嘅新聞，陳寧寧話佢都試過食錯嘢，有幾次飲完鮮奶之後食海鮮，眼同頸都即刻腫晒，仲有啲呼吸困難，依家知道就會小心喇。
卓妮