有人話販毒係利潤最高、害人最多嘅生意，不過家陣有一門生意仲巴閉，講到毛利之高、害人之廣，比販毒有過之而無不及，就係內地奸商經營嘅美容院嘞。
即係咁，愛美之心，人皆有之，愈來愈多女士們去打肉毒素、玻尿酸、膠原蛋白等美容針，希望可以留住青春，留住美貌，造成美容業需求旺盛。本來呢，美容業大行其道係好事，仲可以發展成美麗產業添，可惜吖，內地奸商無處不在，美容機構良莠不齊，結果好事變壞事，美容變毀容，近日一再有本港女士到內地打美容針後出現副作用，需返港求醫，就係證據嘞。
內地傳媒更踢爆，近日全國各地頻密爆發微整形事故，淨係廣東省第二人民醫院咋，一月至四月期間接診因美容失敗導致嚴重併發症嘅患者平均每月達十八人之多，比去年同期上升七成至八成，有人美容變毁容，有人美容變失明，有人甚至差啲連條命都冇埋，問你怕未。
唔使問阿貴，梗係專業水平有問題喇。家陣掛牌幫人做微整形手術嘅醫院，其實好多同臭名遠揚嘅莆田系醫院一樣，表面仁心仁術，實際狼心劣術，明明不具備相關資格，為搵錢夾硬操刀，連打針嘅位置同劑量都未搞得清楚，唔出事至奇喇。
更得人驚嘅係，點止美容業人員質素低劣吖，連藥品都係假嘅。好似日前南京搗破一個生產及銷售假藥品工場，揭發市面賣緊八千元一瓶嘅「肉毒素」，原料居然係成本僅每瓶六毫子嘅凍乾粉，當局形容利潤仲高過賣毒品。其他偽劣貨品好似假手機、假古董、假手錶咁，消費者不慎中招，最多係荷包受傷，但係假藥假醫隨時傷害身體健康，甚至搞出人命，不法商家為咗搵錢不擇手段，你話係咪喪盡天良吖。
冇計喇，內地美容業亂象叢生，危機四伏，講到底都係人心醜陋，監管失職。內地官僚唔係貪污受賄，就係敷衍塞責，明明知道行業七國咁亂，居然隻眼開隻眼閉，就算捉到違法者都係罰一萬幾千元，邊有阻嚇力吖。如果當局對業界敗類有法必依，執法必嚴，罰到佢哋傾家蕩產，仲敢打開門口害人咩？當然喇，家陣中國唔係某個行業造假，某個行業害人，而係形成「人人害我，我害人人」嘅局面，有人話中國人嘅血液本身就流住自相殘殺嘅民族基因，真係冇誇張o架。
諗起都可悲，家陣中國乜嘢都唔缺，就係缺良心，缺道德，中國唔止係人口大國，仲係騙子大國，唔止係崛起大國，仲係山寨王國。如果美容界可以發明一種「良心針」，將中國人嘅醜陋心靈回復潔白無瑕，咁就一天光晒咯！