兩個調查報告將香港未來捧上天，之不過，老朽恐怕捧得愈高，摔得愈重。呢，正當早前穆迪及標普先後調低中港信貸評級展望，勢估唔到瑞士洛桑國際管理學院日前公布二○一六年全球競爭力報告，香港又重登第一位；而中國社科院發表新一份中國城市競爭力報告亦指出，香港去年在全國城市中的競爭力，只輸給深圳排第二，不過，香港又膺全國最和諧城市。
看官，你並非眼花，香港是全國「最和諧城市」！阿哥，社科院假假哋都係學術機構，浮誇成咁，如果香港係「最和諧城市」，敢問全世界還有「不和諧」城市嗎？老朽早兩日才看到本報的「政治解碼」指出，據粗略估計，回歸後香港每年平均舉行七千次示威活動，是全球之最，因而得到「示威之都」的外號。阿哥，唔好蝦我唔識計數，一年七千次示威，即係平均每個月有五百八十幾次示威，咁都叫「和諧」，試問甚麼才叫「不和諧」？
社科院報告嘅解釋咁講：香港廉署執法甚嚴，令社會廉潔、開放及公正；同時土地供應漸見成效，樓價及租金開始回落，亦令解決房屋問題有曙光。阿哥，呢啲調查認真笑死人，完全「堅離地」，正應了腦瓜頂上抹漿──糊塗到頂！香港廉潔指數正在下滑，而房屋問題解決從未見過有曙光！
至於說香港城市「最和諧」，那就是石灰店裏買眼藥──摸錯門兒。若然和諧成咁，北大人來訪又何須驚青成咁，連地磚都要黐膠水？保護北大人，方圓十里，幾乎烏蠅都飛唔到一隻入去。
咁都算喇，香港社會撕裂，立法會常年拉布、掟嘢，旺角黑夜「讓磚頭飛」，南亞兵團、假難民無惡不作：貼街招抹黑富豪、搶掠婦孺阿伯……如果咁都叫做「和諧」，香港真係好到連黃大仙都唔敢拯救喇！