政情：與鄭家純傾生意特朗普怕「魚」
篤定成為美國共和黨總統候選人嘅Donald Trump特朗普，喺參選之前係一個生意人，原來佢曾因生意合作飛到香港同富豪鄭家純、羅康瑞會面，仲食咗餐「背脊骨落」嘅飯。
有美國傳媒報道指出，特朗普早喺一九九四年曾因面臨破產危機，邀請香港富豪注資，一齊開發位於曼哈頓嘅Riverside South，當時特朗普特別飛到香港同鄭家純、羅康瑞二人會面，仲到鄭家純父親鄭裕彤家食飯。
最後對簿公堂 不歡而散
之不過，呢餐飯就令特朗普唔多舒暢，一個當時在場嘅人話，第一道菜係一條蒸魚，條魚原條上，仲張大個口對住特朗普，特朗普形容條魚好醜怪，仲覺得呢個食法好似野人咁。
呢餐飯之後，佢哋就展開咗合作，但最後因為香港富豪們喺二○○五年出售項目，特朗普覺得佢哋賤賣咗物業而對簿公堂，最後特朗普仲輸埋，不歡而散。