政情：陳繁昌籲大學交流勿怕「冷」
香港科技大學校長陳繁昌今日出席一個多用途室的冠名禮時，憶起自己過往喺美國嘅學習生涯，實在受益不淺，所以佢好支持科大嘅學生，畢業前到海外交流學習，而交流嘅地點唔一定局限喺英美國家。佢話曾有不擅西班牙語嘅學生，膽粗粗咁走去馬德里學習，結果期間受到啟發，回港創業實現鴻圖大計，又指有學生到以色列學習希伯來語，其流利程度就連當地人都讚好。
佢又提及一帶一路沿線國家，對好多港人嚟講係冷門嘅留學地區，但佢舉例指出，曾有英國及芬蘭嘅駐港領事，因有上世紀七十年代往北京交流學習嘅背景，後來得到政府委以重任，所以只要肯學，到地球任何一個角落學習，將來都有發揮機會。
嗰個多用途室被冠名為「香港中華廠商聯合會演講廳」，陳繁昌話廠商會嘅捐款可令更多經濟狀況不佳嘅科大生，有「浸下鹹水」嘅機會，而廠商會會長李秀恒就話商界同教育關係向來密切，樂於捐助大學，但鑑於港大校委會目前嘅狀況較為混亂，要待情況明朗後先考慮捐助。