政情：黃毛小學雞 「自肥」都要拗

小組委員會早前就《立法會議員申請發還工作開支的指引》，諮詢全體立法會議員，有關建議均獲大部分議員支持，小組委員會尋日開會通過建議，包括除農曆新年外，議員亦可喺其他節日申領公帑印製應節宣傳品，同埋修訂以公帑購買物品嘅折舊率計算方法等，生效日期追溯至舊年十月一日。至於係咪容許議員就有關選民登記推廣嘅宣傳品，向秘書處申領開支，就要再諮詢政府相關獨立委員會，待政府回覆後再作決定。

「銷毀」「毀消」各執一詞

呢個自肥方案喺十五分鐘內極速通過咗，真係近年少見咁有效率。梗係喇，有着數唔攞就笨。不過，通過咗相關修訂之後，班泛民同建制派又打回原形，乜都拗餐飽。

話說諮詢文件中有關「毀消」一詞喺英文譯本中係「perishable」。公民黨（公文袋）嘅毛孟靜就話，通常會用「容易銷毀」，問立法會秘書處寫法係咪已確認。秘書處回應話有關翻譯係參考咗現時嘅法例字眼。

但議員黃毓民就指中文一定係「銷毀」，冇「毀消」，雖然政府一向咁樣翻譯，但立法會文件改一改亦無傷大雅。而民建聯（民記）嘅議員黃定光（象哥）話兩個均為同義詞，「通俗啲咪銷毀，新潮啲咪毀消」。小組委員會主席劉慧卿跟住問象哥，應該邊一個先好。象哥就笑稱自己比較「保守」。咁點解決先？秘書處就話會再研究係咪可以修改喎。

議員需申報海外股份

另外，立法會議員個人利益監察委員會尋日通過有關《議員個人利益登記》表格嘅新修訂，喺字眼上作出調整，要求議員申報喺本港以及海外公司嘅股份。據了解，閉門會議上討論咗有關劉皇發同田北辰，未有申報海外公司股份嘅投訴，委員會認為兩人干犯嘅只係小問題，唔會再作跟進。