中環出更：鄧國威「被離職」後低調做講者

公務員事務局前局長鄧國威「被離職」後已有十個月，期間佢一直保持低調，冇好似某啲前高官咁極速下海搵真銀、亦冇對下手或政府施政說三道四。尋日終於有佢嘅新消息，原來佢計劃受聘於香港金融管理學院，出任其中一個講座嘅講者。

由於鄧國威離開政府仲未夠一年，期間佢接受任何外間工作，都要事先取得「前任行政長官及政治委任官員離職後工作諮詢委員會」批准。該委員會審核過相關資料後，認為有關工作應該唔會引起任何負面公眾反應或觀感，因此決定批准佢嘅申請。

香港金融管理學院係一間獲內地認可嘅人才交流機構，個名雖然同香港金融管理局好相似，但其實兩者並無關連。講開又講，鄧國威過去喺政府亦較少接觸有關金融嘅工作，唔知佢今次受聘於呢個金管學院，係負責教啲乜嘢同收幾錢人工呢？

卓妮