中環出更：名人保險箱 「存」承紀念物
新界社團聯會尋日舉行就職禮，數以百計政商界同地區人士到場祝賀會長梁志祥及理事長陳勇冧莊做多一年。卓妮見到霍英東集團行政總裁霍震寰、「翡翠皇后」善德基金會主席董吳玲玲等名人，講起最近有銀行通知客戶唔准喺保險箱放爆炸品、武器等構成滋擾或違法嘅物品，董太笑稱有租用保險箱，不過都係放正路嘅重要物品，唔會擺放咁騎呢嘅嘢，霍震寰就笑笑口話佢冇乜貴重嘢，保險箱係用嚟存放結婚證書、畢業證書同子女出世紙等「無用」嘅嘢喎。
今時今日，唔少銀行逐漸縮減保險箱服務，令保險箱愈嚟愈矜貴。董太都有同感，所以放喺入邊嘅一定係好重要嘅物品，例如兒子出世時戴嘅嬰兒手環等，好有紀念價值，第日都會交番畀個仔，代代相傳下去。
講起子女經，育有三條「化骨龍」嘅深水埗區議員鄭泳舜（Vincent）話，依家網上資訊氾濫，佢同太太都好緊張小朋友會唔會接觸到不良訊息。最近有本地網絡作家嘅血腥書通街賣，接獲投訴後先被評為不雅物品，Vincent都擔心囝囝會睇錯書。最近佢嘅七歲次子就突然唔敢一個人瞓覺，細問之下，先知佢睇咗兒童版嘅偵探小說福爾摩斯，入邊有啲魔鬼情節，唔怪得佢同太太咁着緊三個仔，唔敢掉以輕心喇！
陳勇落力培育年輕面孔
講番就職禮，陳勇已做咗五年嘅理事長，任內新社聯嘅氣勢愈嚟愈強大，確係落咗唔少心機。陳勇話佢哋亦已培養唔少政界年輕面孔，可以話係人才濟濟。
卓妮