政情：八網難逃：馮家強被錯認南亞人
曬得一身健康膚色嘅教協總幹事馮家強，尋日出席活動後竟被人當咗係南亞裔人士，仲要放上由自由黨區議員李梓敬做召集人嘅「要求遣返難民大聯盟」facebook（fb）專頁，搞到佢要出貼澄清自己係華裔。
支聯會前日舉辦六四遊行，馮家強亦有出席，仲幫手推支聯會嘅募捐錢箱。但就喺當晚，「要求遣返難民大聯盟」fb專頁就放咗馮家強推錢箱嘅相，張相配以「六四毋忘掠水」字句，仲有留言話相中人係「新移民專家蔡耀昌先生的南亞助手」。被誤當南亞助手嘅馮家強喺尋日就不斷發貼，不停指自己「我係香港人」，強調自己唔係南亞人士。
有人質疑係咪李梓敬認錯人，但佢回應話雖然自己係專頁管理員，但馮家強個貼文唔係佢發，甚至佢自己都覺得有問題。此外，佢話個專頁部分貼文都有爭議性，佢仲會考慮辭任召集人添！