政情：醫委會改革會議 怪醫變「問題議員」
話要改革醫務委員會（醫委會）都講咗好多年，直至今年初政府終於決定吸納立法會議員提出嘅改革醫委會私人條例草案。立法會《二○一六年醫生註冊（修訂）條例草案》委員會經過八次會議，草案預計最快喺下次嘅委員會會議中獲得通過，然後排隊喺立法會大會上審議。
疑欲阻方案通過
但醫學界議員梁家騮（怪醫）喺尋日嘅會議上踴躍發問，佢解釋係因為上次會議不在港，又話主席可以指出佢邊條問題係重複問過，但遭其他議員批評佢「翻兜」一啲重複嘅問題，有議員更批評，怪醫身為業界代表竟然無出席齊所有會議，又反問係咪以後大家可以因為缺席會議而無限發問添！
同屬醫生嘅公民黨（公文袋）郭家麒後來亦發炮，話自己無意阻礙呢條草案通過，但就不滿有啲議員唔畀人問問題，質疑呢啲係「咩態度」。不過，兩位醫生不斷重複又重複咁問問題，確實係會令人懷疑佢哋係咪想阻止呢條對佢哋有影響嘅草案通過。