政情：工廠趣聞 齊齊瞓晏覺
唔少人都習慣喺午飯時間小睡片刻，養足精神下晝工作，但早排有外國研究指有午睡習慣嘅人，患高血壓風險高一成三至一成九，日前我哋見到香港青年聯會會董宋振菲同樂善堂總理任俊彥，佢哋都話冇瞓晏覺嘅習慣，但就諗起過往曾有類似經歷。
任俊彥話似幼稚園
本身係醫生嘅任俊彥話午飯時間基本上都係忙住與同事開會，但中學時代喺工廠做暑期工嗰陣就試過瞓晏覺嘞！佢話當時入到工廠先知，大家拿拿臨食完晏之後，間廠就會熄燈，啲員工鋪啲墊喺地下席地而睡，笑言感覺好似幼稚園。
做IT嘅宋振菲不時到內地廠做嘢，話好多廠仲有呢個傳統，佢第一次去嗰時見啲燈突然熄晒仲以為發生乜嘢事，原來只係瞓覺啫！