政情：瓦礫見人心 政黨鬥卸責
繼香港城市大學塌頂意外後，位於中區荷李活道嘅舊中區警署前晚又發生塌樓事故。本來呢啲事故已經搞到人心惶惶，喺原因未明之前，唔少人已急不及待出嚟抽水同自我宣傳。講緊嘅係中西區建制同泛民嘅區議員，其中民主黨（白鴿黨）許智峯（峯鴿）尋日率先翻炒今年二月嘅委員會會議，指該委員會主席兼民建聯（民記）嘅蕭嘉怡強行終止討論加強監察中環古蹟項目，蕭就反駁由白鴿黨鄭麗琼擔任主席嘅監察小組三月時已成立，但至今仍未開過任開會議。佢哋互相指摘，其實就係互相推卸責任。
掌監察小組 白鴿冇開會
峯鴿尋日引述傳媒報道，指喺二月初區議會舉行嘅食物環境衞生及工務委員會上，佢曾提出將監察中區警署古蹟群及前荷李活道警察宿舍嘅保育及活化工程工作小組，同負責中西區市區重建計劃嘅工作小組合併。佢又指建制派有意取消「關注中區警署古蹟群及前荷李活道警察宿舍發展工作小組，理由係區議員人手唔足以應付多個會議。峯鴿喺塌事故發生後拎番當日嘅嘢出嚟講，似乎係暗示建制派間接造成今次事故。
不過，建制派就有另一個版本。蕭嘉怡反駁峯鴿指控，話佢作為委員會主席，係無權成立小組，因此決定交番畀區議會大會討論。佢又話監察小組喺三月時已成立，由鄭麗琼擔任主席，佢同峯鴿都係成員，惟成立至今冇開過會，以致未能喺意外發生前發揮監察作用，對此感到遺憾。蕭又促請部分議員唔好炒作不幸事件。
事故後人人踴躍「抽水」
有人喺度翻舊帳，無非都係想卸責，但有更多人藉呢件事故抽水喎。相信心水清嘅人都留意到，喺舊中區警署發生塌樓事故後，唔少政黨、專業人士同學者都喺短時間內湧晒出嚟，講解事故原因，又或者透過請願要求相關政府部門同負責機構停止活化工程。大家行動咁迅速，究竟係因為真係關心事故，抑或另有企圖？咁就只有佢哋自己最清楚嘞！