中環出更：卿姐訪日 隨團黨友「鬆綁」
講明唔跟立法會發展事務委員會去廣東考察嘅民主黨主席劉慧卿（卿姐），尋晚亦冇出席特首梁振英嘅宴請，反而決定組團同六名黨友喺下周一到日本考察六天，日本真係有咁大吸引力？
日領事館牽線考察
卿姐話今次係該黨首次舉辦國外考察團，佢同數名黨友早前與日本駐港總領事松田邦紀會面時，對方提到香港係日本食品出口最多嘅地方，佢就向對方提出希望自費到日本考察，對方就安排行程，期間將會見日本外交部、國會議員同埋香港駐日本經貿辦人員，亦會考察車廠同鄉郊發展項目。
佢預計呢次行程每名黨友需要付上約一萬港元，黨會補貼旅遊巴同翻譯等費用。至於部分晚上冇安排行程，被問到會否下令黨員唔可以去KTV，黨友馮文韜就話會自律，「跟住卿姐唔會亂做嘢」，卿姐就笑指「唔會用繩綁住佢哋」。
點解唔去考察東江水？卿姐話自己唔係發展事務委員會成員，兼且大家都係中國公民，出入自由係權利，如果唔係所有人都能夠自由進出內地，佢就唔會再到內地，「我依家日本都去得，真係好諷刺」，但黨內仍未討論相關事件。佢又唔擔心唔出席梁振英嘅晚宴會造成不願溝通嘅印象，因為舊年政改否決後，該黨亦有與梁振英會面。
卓妮