自願醫保拖字訣 公院炸彈遲早爆

即係咁，港府為咗推卸公共醫療嘅責任，企圖將中產人士分流去私家醫院，多年前搞出自願醫保計劃，點知研究復研究，諮詢再諮詢，至今仲未有落實時間表。食物及衞生局局長高永文尋日被人「追數」，佢話喎，公眾諮詢顯示主流意見支持推行計劃，不過對於輿論最關心嘅「必定承保而附加保費設上限」同「保單自由行」兩個項目，佢就話因為涉及高風險池，推行時可能會遇上較大阻力，所以現階段傾向稍後至推動，但政府唔會放棄咁話。咁即係點？咪即係拖字訣囉。

其實，高永文使乜講到咁閃縮吖，直接承認束手無策咪得囉。嗱，保險業界就坦白得多嘞，講明要接受「保證承保」要求都得，先決條件係政府必須為高風險池作出長遠財務承擔，否則無論係高風險池定保證承保都絕對無法持續運作咁話。簡單啲講，如果港府繼續縮骨，拒絕承擔，業界就唔會陪港府玩。

醫保計劃一波三折，淪為施政燙手山芋，呢個係有目共睹嘅事實。喺殘缺方案之下，一方面社會擔心條款太苛刻，最終可能好似強積金咁，淨係保障到財團而保障唔到市民嘅健康，一方面保險業又擔心機制過分傾斜，隨時變成醫療大鑊飯，不斷飆升嘅申索金額會遲早爆煲，港府兩面不是人，唔搞到灰頭土臉至奇喇。不過咁喎，樣衰還樣衰，困難還困難，當局始終需要有個了斷，唔能夠一直無了期咁拖拉落去㗎。本港人口老化問題愈嚟愈嚴重，公營醫療體系負擔愈嚟愈沉重，前線醫護嗌晒救命，病人及家屬怨氣沖天，但係政府唔肯增撥資源，家陣自願醫保唔湯唔水，受害嘅咪又係一般市民。

講起醫保計劃真係火都嚟，港產官僚議而不決，決而不行，由上屆政府講到今屆政府，由強制醫保變成自願醫保，浪費咗咁多年時間，到今日仲係未有一個清晰嘅講法，你話係咪不負責任吖？咪畀人睇死，今屆政府剩番一年多日子，肯定更加跛腳鴨，根本無能力推動任何惹火議題，家陣自願醫保無聲無息，你慌港產官僚唔係想拖得就拖，將個爛攤子卸畀下屆政府咩！

一句到尾，自願醫保只係政府推卸公共醫療責任嘅縮骨橋，根本唔係拆解公院炸彈嘅治本之法，阻力重重有乜出奇。反正港府已經扯咗半支白旗咯，不如咁喇，索性果斷啲，正式宣布收皮好過。