政情：丁屋論壇 薛浩然舌戰泛民
早年有丁屋僭建問題，到近期又有套丁案，令到檢討丁屋政策嘅聲音四起。工黨尋日搞咗個研究會討論丁屋政策，邀請咗土地正義聯盟朱凱迪、本土研究社林芷筠、工黨副主席郭永健，以及鄉議局研究中心主任薛浩然。薛浩然出現喺呢個名單，可算係單刀赴會為丁屋政策護航，雖然佢一開波就話自己非原居民，唔係丁屋政策受益人，但佢其實係鄉議局前主席劉皇發嘅妹夫，邊有咁易劃得清界線呢？
稱原居民無爭奪土地資源
薛浩然喺研究會上大講歷史，指新界當年係租借予英國，有別於割讓嘅九龍、香港，所以新界嘅土地性質、管治方式並不相同，原居民並非靠惡同野蠻去換取權益。其後佢回應其他講者時，又話起丁屋嘅土地同資金都係屬於原居民，而丁屋更限死喺村界範圍內興建，無地就無得起，所以絕無爭奪社會土地資源，反而轉去批評政府將原居民私人土地納入綠化帶添。薛浩然以一打三都不落下風，仲迴避埋套丁問題，難怪被觀眾批評佢遊花園喇！