政情：華員會狂數張雲正
香港最大公務員工會「華員會」在最新一期會刊中提到，上月中曾去信公務員事務局局長張雲正，要求交代華員會舊年提出多項訴求嘅具體進展，而當局喺上月底已回覆該會。不過，華員會對回覆表示不滿，認為當局作出嘅正面回應不足，直斥局方官腔、老調，充斥住上一任局長「畫地為牢、因循守舊、僵化的思維」，未能把握機會撥亂反正，睇嚟張雲正餘下一年任期真係要醒醒定定喇！
重彈前任局長老調
華員會認為，舊年該會喺張雲正上任時提出嘅訴求，已經按「先易後難」次序分批處理，而且牽涉面唔太廣，視乎政策取向就能解決。不過，當局嘅回應就未能滿足該會，更批評大部分回應都係原地踏步、不欲研究。好似當局重彈上一任局長嘅「老調」，以「公務員及醫管局員工各自享有不同嘅聘任和服務安排」為由，拒絕讓醫管局支援服務職系員工同公務員達到「同工同工時」；又迴避有薪「食飯鐘」嘅訴求。
至於針對出席國情研習嘅工會幹事可享特許缺勤一事，當局又只係話「準備適當地給予特許缺勤的批准」，華員會認為迴避咗現實需要。此外，為非公務員合約僱員爭取准許到公立普通科門診診療嘅訴求，就被當局以薪酬條件為「全包式」而拒絕作出改善，因而被華員會批評無視歧視性待遇嘅不公義性質。
鬧爆無前瞻性眼光
除咗原地踏步，當局都有部分回應被歸類為欠缺交代同不欲研究，好似當局以「必須從長計議」去回應停止扣除遞增薪額開支嘅訴求，被指無交代會唔會着手研究；當局又表示無充分理據改變二○○○年六月後入職嘅公務員服務條件安排，換來無前瞻性嘅眼光去優化制度嘅批評。不過，華員會並非「百彈齋主」，都有認同當局就阻嚇、懲處語言暴力對公務員嘅侵害，以及協助有意嘅全職非公務員合約僱員轉職公務員兩項訴求，有比較正面嘅回應。
華員會社評表示，面對依家持續低迷嘅經濟及愈趨民粹化、泛政治化嘅局面，加上未來有多場選舉同新舊政府交接，情況之複雜、嚴峻，不容低估，穩定公務員隊伍尤為重要，期望張雲正再出發。隨住早前公務員薪酬趨勢調查結果揭盅，全體公務員獲得高於通脹嘅理想加薪結果，唔知會唔會令公務員團體嘅怨氣稍為平息，畀張雲正一個喘息機會呢？