中環出更：李梓敬拉隊唱K 寸盡馬恩國
由「粗口大狀」馬恩國任主席的中澳法學交流基金會早前訪京，點知就爆出團友去KTV攬女兼與年輕女子臉貼臉親密合照醜聞，但竟然有政界中人仍未吸取教訓，公然拉隊去「KTV」。深水埗區議員李梓敬前日同當區一班區議員去私竇「KTV」，仲將自己與深水埗區議會主席張永森嘅「親密」合照上載到社交網站，寸爆馬恩國的訪京團。
有網民就讚李梓敬「靚抽」，但亦有人嫌他們「有着衫有着褲」，太正經喇！李梓敬話，呢間所謂嘅KTV其實係一位民政事務處前秘書嘅band房，最近興去KTV，所以他們一班區議員先同呢位前秘書「搞吓笑」，去唱吓歌，但實無交流團咁開心喎。被問到有冇年輕女子陪住唱歌仔，李梓敬就反問︰「陳穎欣（深水埗區議員）算唔算吖？」
李梓敬又話，前日大家唱咗好多歌，連泛民主派集會飲歌《海闊天空》都有唱。而佢唱歌就唔係好叻，平時去唱K都只會唱《歲月如歌》，反而張永森就真係好鍾意唱歌喇。他仲大爆原來曾參加電視台歌唱比賽《星夢傳奇》嘅藝人張明偉就係張永森個仔，莫非真係有其父必有其子？
卓妮