中環出更：唔使有病先睇 「妮」搵中醫調理身體
中醫唔一定係有病先睇，平日一樣可以食中藥固本培元，增強體魄健康。博愛醫院位於何文田愛民邨的浸會大學中醫教研中心尋日開幕，卓妮見到一向係中醫擁躉嘅博愛醫院主席陳李妮（Lily），佢早幾日於美國返港，落飛機第一件事就係去搵中醫把把脈，執啲材料煲湯，但佢唔係病咗，只係認為應該病向淺中醫，所以定時定候就會調理身體，得閒仲會去針灸添！
Lily話，今次返港，中醫話佢燥熱，可能係喺美國食得熱氣嘢多喎，而夜瞓同有時唔覺意發脾氣等都會影響身體健康。佢話今次係博愛醫院設立第四間教研中心，今年暫時唔會再開設新嘅中心，但會繼續推動中醫服務，打響博愛醫院優質中醫品牌。
彭少衍擬開發婦兒診所服務
本身經營中醫保健食品生意嘅衍生集團主席兼博愛副主席彭少衍亦有現身，佢話正準備於香港開設婦兒中醫專科診所，事關香港中醫多為全科，而早前有調查指本地超過六成到中醫診所求醫嘅病人均為婦女，故認為有潛質開發婦女及兒童專科中醫服務，預計最快今年內開張。
同場仲有副主席簡陳擷霞、博愛醫院總幹事鄺國光、副總幹事吳凱孚及高級中醫服務經理區美如等等。平日都有運動習慣嘅簡陳擷霞身體狀況一向好弗，精神又好好，因此好少睇醫生。不過，佢就記得有一年傷風，持續咗一段時間都止唔到鼻水，所以就去咗試吓針灸，喺鼻翼兩邊一個叫「迎香穴」嘅穴位落針，即時止咗鼻水，令佢不得不驚嘆中醫真係博大精深喎！
卓妮