話說以前有個叫孫彥高嘅州官，某年賊兵來犯，當堂嚇到閉戶不出，等到賊兵攻上城頭，呢位孫老爺索性匿入衣櫃，仲吩咐下人萬一賊兵打入嚟，千祈唔好畀條鎖匙佢哋。咪當古仔咁睇吖，今日香港官躲賊兵，貓掉番轉買老鼠怕，都係一擔擔嘅咋。
呢，天水圍嘉湖山莊對開嘅泥頭山存在多年，港產官僚學足孫老爺匿入衣櫃，眼不見為乾淨，直到傳媒踢爆至係咁意做吓樣，勒令土地擁有人採取措施防止情況惡化。既然官府懶理，有關人等自然唔使同你客氣，家陣泥頭山範圍已經擴展至附近官地，地政總署班官老爺惟有死死地氣「出櫃」，話會採取檢控行動，每日派員視察喎。
加強執法？聽住先喇。泥頭山部分地段業主及負責人，早前因未能喺指定期限內向規劃署提交資料而遭票控，點知最終只係罰款區區兩萬幾蚊，犯法成本低成咁，與其話阻嚇，不如話係鼓勵。咁搞法，今次就話侵犯官地堆泥頭，下次容乜易填平禮賓府o架！
罰款當成本真係好過癮o架，唔信可以問吓壹傳媒。淫媒多年來宣淫販賤、侵犯版權等案底仲厚過電話簿，但次次都係罰款一萬幾千，賣廣告都唔止呢個價。最離譜係霸王國際遭《壹週刊》誹謗一案，淫媒老作新聞搞到對方股價蒸發，商譽掃地，損失超過六億元，結果淫媒賠款三百萬了事，二百分之一咁大把。有議員就講得啱嘞，賠償額連車馬費都唔夠，盞進一步鼓勵淫媒將賠償當成本嘅咋！
當官不為民作主，不如回家種紅薯。港府姑息淫媒已經夠離譜，對假難民問題放軟手腳，更幾乎搞到香港陸沉，特別係警方高層被指包庇本地黑幫組織假難民犯罪兵團，警賊一家親，貓捉鼠變貓護鼠，簡直不知所謂。人必自侮而後人侮之，唔怪得激進勢力愈來愈囂張，愈來愈當差人冇到，叫你「黑警」又得，淋你尿又得，掟你磚頭都仲得。
學北大人話齋，港府「要法律有法律，要槍有槍，要炮有炮」，可惜吖，回歸咁多年，愛國愛港冇好報，反中亂港有運行，證明空有法律槍炮而不用，同博物館嘅陳設冇乜分別。法之不行，自上犯之，港府咁多年有法不依，執法不嚴，卒之搞到禮崩樂壞，威信掃地，法治不斷受到挑戰。港府施政寸步難行，講到底都係自取其辱。
當年孔子講過，「君不君，臣不臣，父不父，子不子，雖有粟，吾得而食諸？」今日社會亂上加亂，君臣父子各卸其責，市民想食啖安樂茶飯都難，都係疊埋心水移民瓦努阿圖好過咯！