排頭位苦候八小時
「仲要排多兩、三次，先可以剝晒啲爛牙。」陳女士指早一晚便要前來排隊，需苦候八小時，「去到凌晨四點，已經有成四十人排隊，牙科服務真係爭崩頭！通常七點半前就冇晒位。」她又表示，「之前間牙科診所喺觀塘道，要坐樓梯喺街等，真係幾慘！之後搬咗嚟協和街，到星期二晚上十一點，當局就開閘畀輪候求診者入內等，已經算好好喇。」
社區組織協會幹事連瑋翹指出，政府牙科服務要求病人取籌及登記後，便往牙醫診症室外排隊，他形容，整個流程如流水作業，「病人排隊見牙醫，醫生睇完後，叫病人排隊照X光，照完X光，病人排隊打麻醉，之後再排隊剝牙。」