政情：八網難逃：「彪」示四眼舊照 推廣健康

以前智能電話仲未普及，已經搞到唔少立法會議員成為四眼仔女，依家人人都有智能電話，學童眼睛健康問題就更加不容忽視喇。議員鄧家彪（Bill）尋日喺個人社交網站上，公開一幅「由彪媽提供」嘅童年四眼照，相中嘅阿Bill戴住一副圓框大眼鏡，企喺戲院電影海報前陰陰嘴笑，齣戲仲寫住「兒童不宜觀看」添！不過，阿Bill就話自細深近視同睇戲無關喎。其實佢出賣童年照，只係想呼籲公眾參與學童使用智能電話同眼睛健康情況嘅問卷調查啫。