政情：馬恩國監警會無得留低
政府尋日公布再度委任郭琳廣擔任獨立監察警方處理投訴委員會（監警會）主席，為期兩年，但最近接二連三爆出醜聞、外號「粗口大狀」嘅中澳法學交流基金會主席馬恩國，就不獲續任。馬恩國繼訪京後引述基本法委員會副主任張榮順，指中央處理港獨「要槍有槍，要炮有炮」，被轟錯誤引述後，不久又爆出基金會兩名男團員訪京期間夜蒲攬女。事件觸發基金會「跳船潮」外，最新係佢將不獲續任監警會委員，預計佢嘅公職將會遞減，意味其政治生涯或玩完。
馬恩國嘅監警會委員任期將於月底屆滿，將不獲續任，相信同佢個人及基金會連串醜聞有關。馬恩國回應傳媒查詢時死撐，不獲續任與訪京團夜蒲醜聞無關，又指自己自一○年起獲委任，至今已經六年，今次純粹係夠鐘走人。不過，心水清嘅人都知道，最近嘅醜聞已經令馬恩國名譽受損，委任公職或續任分分鐘連累埋相關機構，相信監警會只係一個開始，估計佢現時嘅公職任期屆滿後，同樣將不獲續任。