眾所周知，立法會議員人工高、福利好，單係可申領嘅辦事處營運開支，每年就超過二百三十八萬元。不過，一班議員仍未夠喉，早前希望放寬申領指引，並由秘書處進行諮詢。諮詢結果尋日出爐，一如所料所有建議均獲大多數議員支持，包括放寬申領製作宣傳品開支、調高資本項目價值等。議員開支由公帑找數，但竟然毋須諮詢社會大眾，而受惠嘅議員根本唔會反對，真是名副其實嘅假諮詢。
立法會議員酬金及工作開支償還款額小組委員會早前檢討申領開支指引，提出多項建議，包括放寬與節日有關嘅宣傳品，只要包含議員姓名及聯絡資料便可申請發還開支。如選民登記嘅宣傳品不帶有政治傾向，唔係用作呼籲支持某政黨或人士，就唔會被當作選舉相關活動，換言之選民登記宣傳品亦可申領公帑補貼。
此外，現時價值一千元以上而可用超過一年嘅設備及家具，如議員已獲發還開支，卸任時需交還秘書處。新建議就將資本項目價值下限調高至三千或五千元，即少於三千元嘅項目就毋須歸還，結果亦分別獲得六成半和三成半議員支持。其實在申領指引放寬前，唔少議員已被質疑濫用公帑製作宣傳品，現時再放寬申領指引，相信會造就更多超級「大花筒」。
卓妮