中環出更：回歸傳統 食肆省靚港招牌
香港人識飲識食，仲好易貪新忘舊，所以做飲食業要時刻摸熟食客心態、調整經營策略。早前一眾城中愛酒名人齊聚灣仔一間法菜私人廚房舉行靚酒配佳餚晚宴，以分子料理聞名嘅米芝蓮星級食肆Bo Innovation股東謝健豐（Benson）夫婦都有到場。Benson笑笑口話，好多人話分子料理食唔飽，加上熱潮已過，所以佢哋將會喺菜單上大幅減少分子料理比例，做番實際啲、食得飽嘅菜式。
Benson話，現時市道淡靜，餐飲業受到好大影響，但仍不斷有國際名廚來港開店令競爭加劇，所以佢哋一於回歸本土及實際。佢即將喺香港國際機場開嘅街頭小食店，賣嘅腸粉就已經有幾款選擇，包括韓式、日式及港式，希望省靚香港「美食天堂」嘅招牌。
同場仲有傑青兼時裝設計師丘雪祺、酒櫃設計品牌Sensis總經理馮潔瑩及西班牙著名酒莊Finca Egomei高層Celina，仲有搞手兼Sensis拍檔林梁綺雯（Magi）等人。
林梁綺雯鍾情西班牙酒
Magi做酒代理及投資多年，一直好鍾意法國、意大利及美國等產地靚酒，直至五年前接觸到西班牙酒，自此愛不釋手。晚宴當日仲出動一百年嘅西班牙拔蘭地與好友們分甘同味，眾人梗要飲多杯啦。
卓妮