本港經濟陰霾密布，百業蕭條，不過有一個新興行業不知幾咁蓬勃，係乜？咪就係貼街招抹黑勒索囉。
唔係靠嚇，亦冇作大，貼街招勒索呢門勾當係由黑幫和勝和前坐館「上海仔」郭永鴻首創，由膽正命平嘅南亞假難民做爪牙，四圍抹黑恐嚇，有富豪被迫就範，敲詐金額唔知幾和味，真係好過揸刀搶o架。
睇「業績」就一清二楚喇，「貼招黨」前年開始活躍，短短兩年間「客戶」網絡遍布社會中上層，唔止富豪同娛樂圈女星中招，近日連內地來港嘅上市公司老闆都淪為勒索目標，受害人嘅相片同抹黑訊息被貼到周街都係，簡直無法無天。抹黑街招愈演愈烈，隨時仲多過中環商廈嘅廣告牌，難怪有人質疑貼招勒索已經成為一門新興行業，如果唔係上海仔開咗檔嘢接生意，就係有人見黑思齊，有樣學樣，香港遲早變成罪惡滔天嘅「勒索城」都似。
點解貼招黨猖獗成咁？咪因為港府有法不依囉。學似北大人話齋，港府要槍有槍，要炮有炮，要法律有法律，抹黑街招涉及恐嚇勒索，屬嚴重刑事罪行，最高刑罰係監禁十四年，只要當局依法辦事，殺一儆百，不法之徒自然唔敢放肆，可惜當局放軟手腳，貼招勒索成為一門本小利大嘅黑生意，唔氾濫成災至奇喇。冇冤枉佢哋o架，警方今年初搗破一個黑幫街招印刷工場，當場檢獲大量街招及拘捕多人，證據確鑿，點不知拖到依家仍未落案起訴，話無人包庇都冇人信喇。
最離譜嘅係，上海仔頭馬「大舊」去年曾向一名本港富豪發出恐嚇短訊，指若要追回欠款就會遭貼街招抹黑，擺明恐嚇，該富豪向警方舉報，案發至今快一年嘞，調查有如石沉大海。大家話嘞，當局好似同黑社會有親咁，上海仔作惡多端唔去捉，貼招黨明目張膽犯法唔去理，香港點會唔法治淪喪、烏煙瘴氣吖。領導人訪港千叮萬囑要港府依法辦事，強調無人可以凌駕法律之上，結果大家都睇到喇，黑社會、貼招黨咪就係凌駕法律之上咯。港府有法不依，尸位素餐，任由蠱惑仔為非作歹魚肉市民，再咁落去，港人治港就變成黑社會治港，高度自治就淪為貼招黨自治嘞。
講到底，打蛇打七寸，擒賊先擒王。貼招犯案嘅都係充當炮灰嘅爛頭蟀，就算警方拉幾多都冇用，只有將幕後主腦繩之以法，先至可以將犯罪集團連根拔起。仲有喎，上海仔唔止係貼招黨蛇頭，仲係「南亞兵團之父」，係香港亂象叢生的根源之一，港府繼續姑息養奸，遲早自作自受，下一個勒索「客戶」可能就係政府官員吖！