脊山麻理子離婚都要脫

好多女明星都要為藝術而犧牲,或多或少作性感演出,即使已嫁作人妻亦係一樣。前日本電視台女主播脊山麻理子因為拍性感寫真令老公不滿,最後離婚收場,點知麻理子認為咁樣仲好,冇壓力可以愈剝愈多。

迷人美魔女

早前一位天后級女歌手罕有地拍電視劇,其演技就……唔使多講,之但係其美貌以及激凸嘅身材卻成功引起話題!老實講,呢位天后年紀快到40歲,但係美貌更勝從前,魅力爆燈,實在難得。喺日本藝能界,同佢一樣令人驚訝嘅美魔女亦有唔少,今年36歲嘅脊山麻理子就係其中一位。

麻理子生得一副瓜子口面,五官標致,當中特別以雙眼最有吸引力,眼神透發神采,電力十足得嚟又帶幾分精靈可愛。至於身材方面,麻理子屬於纖巧型,但絕對唔係骨瘦嶙峋,而係骨肉比例平均,上圍亦唔會話冇睇頭,胴體具曲線美,對於一個三十幾歲而且結過婚嘅女人嚟講的確好難得!

老公頂唔順

麻理子喺1997年參加一個叫做《涉谷109廣告模特兒競賽》並成功奪得冠軍,從而踏上模特兒之路。雖然期間因為要完成喺慶應義塾大學環境信息系嘅學業而短暫停工,但佢一畢業之後第一時間重返模特兒崗位。由於麻理子有學識又精通英語及西班牙語,加上外表一派斯文端莊,被電視台邀請做女主播兼記者,可以話名副其實嘅才女。不過,呢位才女亦唔好惹,話說喺2009年麻理子搭電車嘅時候遇上色狼,呢個色狼真係唔好彩,索油索着火水,唔知麻理子係運動健將兼且學過防狼術,成功將色狼制服送交有關方面處理。

而麻理子嘅性格亦同身手一樣強悍,據悉佢嘅圈外老公唔鍾意麻理子明明好哋哋做女主播,但係就成日發晒姣咁拍性感寫真,搞到二人多次嗌交,不過麻理子依然寸步不讓,堅持拍寫真,上年老公終於頂唔順,最後離婚收場。麻理子離婚之後,不但冇唔開心,反而冇咗包袱,演出更加激烈,衣着更加性感,令粉絲大包眼福!

個人博客

簡介:脊山麻理子經常將工作及生活中嘅點滴放上博客同大家分享,想了解麻理子更多,及欣賞佢嘅靚相,可以Click上去睇睇。

網址:http://ameblo.jp/seyama-mariko/

脊山麻理子Profile

年齡:36歲

身高:5呎5吋

三圍:33-22-33

撰文:賢