政情：樹根宣傳車硬食「牛肉乾」
立法會議員鍾樹根又有新搞作，租咗部大貨車宣傳「要本土、不要分離」，尋日下午三時喺立法會外舉行開步禮，點知未開車已「甩轆」，有人發現宣傳車頭水撥，夾上一張俗稱「牛肉乾」嘅違例泊車定額罰款通知書，盛惠三百二十元，認真「贈興」。
據宣傳車司機話，大約一時許，有警員到場指收到立法會投訴，司機於是喺附近兜咗一圈再折返，點知有警員再向司機表示收到投訴，司機話由於難以找到適合停泊地點，所以主動建議警員抄牌。
樹根回應時引述警員話收到立法會十幾宗投訴，指受到宣傳車停泊影響，所以警方要採取行動，佢又指今次係政治問題！