中環出更：台米銷港 老行尊食指動
香港人無米不歡，難怪好食但價錢唔平嘅台灣米近幾年入口量快速增長。台北貿易中心早前搞咗個台灣米及茶葉品嘗會，好多本港大米商都去捧場，包括香港米行商會名譽會長符之福（James）、香港食品委員會會董唐大錦及「糧油大王」通泰行董事長李廣林等人。
James係業界老行尊，查實佢亦係「米界IQ博士」，事關經常喺公司同屋企做米嘅實驗，作品包括米熱狗、米漢堡及米蛋糕等，佢即時展示手機內嘅各種米製品，睇到個個大開眼界兼流晒口水。佢話，試過嘅實驗五花八門，有時將米煲熟嚟整，有時直接將生米磨成粉，變成名副其實嘅「米粉」，然後用嚟製造麵包或蛋糕。由於唔同分量有唔同嘅口感，所以百試不厭喎。
App賣飯團抗衡貴租
代理泰國香米嘅唐大錦亦好鍾意食米，佢對台灣糯米特別讚不絕口，次次去台灣都會食飯團，即係粢飯，仲話香港粢飯用嘅係泰國糯米，唔夠煙靭咁話。
台灣米代理商添安產品總經理黃義明及西龍（飲食）集團總裁吳鴻圖（Tony）都有到場，早幾年Tony開咗幾十間標榜低熱量及即叫即做嘅飯團連鎖店，極受忙碌又講求健康嘅港人歡迎，佢用嘅紫米同糙米就係由台灣入口。Tony話，雖然生意唔錯，但係始終不敵昂貴租金及人工，所以後來陸續關店。最近佢決定用自動販賣機捲土重來，配合手機應用程式落柯打自取，希望可以殺出一條血路。
卓妮