北大人來也匆匆，去也匆匆，埋單計數，反對派鬆毛鬆翼，有人話當面向領導人反映撤換梁振英，阿爺並無不悅之色，反而同場嘅CY嚇到連手都震埋喎，唔通真係「倒梁」有機？
講真，反對派匿埋自high冇所謂，但阿爺已經開到聲叫港人「支持行政長官同特區政府工作」，證明所謂「倒梁」適得其反，又係空歡喜一場。
所以話，做嘢幾時都要注意方式方法，方式方法唔啱，就算嗌到喉嚨出血都係嘥氣。功夫茶一向與人為善，喺度就免費醒兩招過反對派。其實要了解阿爺點諗唔難，只要逆向思考，睇下「祖師爺」指示就得。毛伯伯咪一早講過，「凡是敵人反對的，我們就要擁護；凡是敵人擁護的，我們就要反對」囉。
冇錯嘞，「互相猜疑」係中國人嘅劣根性，亦因為咁，反間計喺歷史上萬試萬靈。反對派多番書仔，可能未聽過《三國演義》「蔣幹盜書」嘅典故。話說赤壁大戰前夕，曹操計劃攻打東吳，謀士蔣幹勸降周瑜，點知對方設下計謀，偽造曹操水軍都督蔡瑁、張允寫畀東吳嘅降書，並故意畀蔣幹「偷」到手。結果曹操一睇「降書」，怒不可遏，立斬蔡、張二人。不過曹操都唔笨，面對馬超及韓遂嘅西涼大軍束手無策，佢亦用反間計，故意同韓遂扮friend，仲同佢「禮尚往來」，結果成功離間馬韓聯盟，反敗為勝。
睇到呢度，反對派識點做啦。唔想CY連任其實可以好簡單，改倒為撐，愛佢錫佢就得嘅嘞。長毛、袋巾梁等大可改口對梁班子讚不絕口，周不時入禮賓府密密斟就再好不過。嗱，九月立法會選舉就到，連口號功夫茶都幫你哋諗埋，「CY唔連任，港人好遺憾」又或者「送佛送到西，CY請留低」，係咪好押韻呢？如果想再煮重佢米，不妨拉埋外部勢力落水，「X國領事誠意推荐CY」，阿爺睇到，仲唔疑心佢哋有路咩，仲會信任CY咩。
話時話，出嚟行除咗預咗要還，仲要得人恩果千年記。問心講，CY對反對派都算唔話得，佔中搞到香港雞毛鴨血，幕後黑手至今逍遙法外；淫媒老闆大搞黑金政治，破壞香港廉潔核心價值，毛都冇少一條，旗下報章誹謗斷正，亦只係罰少少錢算數。點解CY對反對派咁有情有義？有人質疑佢啲仔女喺晒英美，所以有後顧之憂，唔係冇道理o架。點講都好，CY連任最符合反對派嘅利益，換着第二個強硬啲嘅上台，反對派肯定冇今日咁過癮！
一句到尾，倒梁其實撐梁，撐梁方可倒梁，反對派仲唔拿拿臨過檔做「梁粉」！