政情：工作狂忽略囝囝 梁耀忠抱憾
點解勞工界要爭取標準工時立法？相信立法會議員梁耀忠可以作為一個例子。阿忠尋日喺深水埗一個活動中真情剖白，話為咗應付議員嘅工作，工時又長，未能抽時間陪伴囝囝成長，導致父子關係冷淡，實屬人生憾事。
接觸少情更薄
阿忠話自己得一粒仔，按理獨生子應得到父母萬千寵愛，但可惜佢同太太鬧離婚。儘管阿忠得到撫養權，但就抽唔到足夠時間陪伴囝囝成長。雖然佢每逢假日例必同囝囝四出遊玩，但囝囝始終生活喺一個單親家庭，每當囝囝需要傾訴對象，佢都唔喺身邊。後來囝囝十三歲到外國讀書，父子接觸更少，大家嘅關係就更淡薄。
依家囝囝廿四歲學成歸來，較明瞭爸爸嘅處境，兩者隔閡亦略有改善，但係過長嘅工作時間，始終有礙父子感情。
阿忠尋日係以嘉賓身份，為香港社區組織協會推介今年九月舉辦一項關注釋囚嘅展覽會。協會幹事練安妮話展覽目的係呼籲大眾以寬容態度看待釋囚，畀機會佢哋重投社會。