政情：「思」憶受查往事 因禍得福
人生總會經歷高低起跌，正如由商界踏入政界嘅陳智思，曾任立法會保險界議員，以至成為行政會議成員，一時間變成政界紅人，更有「公職王」之稱。政途看似一帆風順嘅佢，原來亦有跌倒時。佢尋日喺電台節目中自爆，當年任立法會議員期間，曾被證監會調查，歷時兩年，又形容過程痛苦，但係咁佢反而因禍得福，避過金融海嘯。
避過金融海嘯
陳智思喺電台訪問時自爆當年出任立法會議員期間，佢所出任董事嘅公司曾遭證監會調查，雖然佢自己冇做錯事，但被調查過程歷時兩年，期間唔知最終結果係點，亦深知身為議員，如出事會影響公眾觀感，感到好大壓力，佢又形容調查嘅過程痛苦，亦都係佢人生最低點。
又因為呢次事件，佢進行咗風險管理，將證券同銀行業務全部出售，反而令佢避過金融海嘯。咁就真係因禍得福嘞！