政情：斥新思維太建制 執委離巢
標榜走中間路線嘅政黨「新思維」成立短短四個半月，就爆出有執委退黨。新思維執委黃良喜書面通知黨主席狄志遠，表示辭任執委及退出新思維，又批評新思維輕泛民而較着重建制，黨嘅論述及立場同自己有根本分歧。
黃良喜憶述，喺九八年隨狄志遠及黃成智加入民主黨，狄黃二人喺舊年因政改退黨，而自己亦因特殊原因退出，其後獲邀加入新思維，希望新思維能站穩溫和泛民嘅角色，但黃良喜同時話隨着黃成智淡出，以及前新民黨同民建聯成員等人加入，新思維表現出「輕泛民而較着重建制」，同佢本人有根本分歧，因此決定退黨。
狄志遠反駁非事實
狄志遠回應話成員離合係正常，強調「再見亦是朋友」，會尊重黃良喜嘅睇法，但其後又反駁對方嘅說法並非事實，一切可能同黃係非活躍成員，或者唔知黨內嘅討論有關。
狄重申，新思維一直走非泛民、非建制嘅中間路線，亦唔認同偏激，該黨容納建制、泛民政黨嘅唔同派別人士。