中環出更：名人凍齡有術 秘方兩個「較」
「美魔女」凍齡有術，真係羨煞旁人。咁啱早前喺港澳台灣慈善基金會（基金會）嘅晚宴上，見到基金會副主席兼漢生堂藥業董事長李嘉音，講到凍齡，佢喺呢方面就最有心得，事關佢有自家配方o架！
原來嘉音姐長期服用自家延緩衰老中藥，所以一日趕幾場都仲保持容光煥發。佢話最近呢隻藥仲被內地科技部及衞計委臨床證實可有效治療不孕，可見中藥補腎療法係老祖宗留下嘅好東西，仍不斷有新嘅治療領域被發掘添！
轉頭見到珠海學院校董會主席江可伯，九十一歲高齡嘅佢睇落好後生，唔少人趁機請教佢養生之道。江可伯笑笑口話秘訣係信兩個「教」。咦？信教可以凍齡咩？原來佢講緊嘅係「不比較」、「不計較」喎。
江可伯勤運動養生
江可伯話做人最緊要開心，所以佢經常勸人要信呢兩個「教」。此外，佢仲要感謝父母遺傳好基因畀佢，加上勤做運動，先至可以保持健康。至於珠海學院升格大學嘅進展，佢話目前正準備申請進行院校評審程序，進展好順利。
當晚主題係祝賀身兼基金會總理嘅「私人貸款之父」長原彰弘，獲中大頒授榮譽院士，數十名居港台灣幫濟濟一堂，包括台北經濟文化辦事處處長嚴重光、基金會創會主席林添茂同主席張佐民、光華新聞文化中心主任盧健英、台北經濟文化辦事處組長黃秀嫚等駐港機構代表，以及港澳台灣同鄉會會長林華琴等人都嚟趁熱鬧。
創辦《愛心獎》嘅林添茂話，長原彰弘多年嚟一直慷慨支持，做人有情有義，係成功男人嘅典範。
卓妮