北大人引《獅子山下》歌詞，寄語港人「放開彼此心中矛盾，理想一起去追」。計功夫茶話齋，另一首「羅記」名曲可能更加應景︰「知否世事常變，變幻原是永恒。」正因為港產官僚一本通書睇到老，計劃永遠跟唔上變化，卒之咪搞到施政甩甩漏漏，民望跌跌不休囉！
市建局首個資助出售房屋項目「煥然壹居」售樓期上周結束，銷情異常冷淡，唔單止出現集體甩底潮，仲錄得兩宗撻訂個案，準業主損手幾十萬離場在所不惜，講到底都係睇淡後市嘅咋。
冇錯，整體樓市掉頭向下，「煥然壹居」好難獨善其身。當年負資產滿街，燒炭跳樓慘劇不絕如縷，市民見過鬼都怕黑，加上經濟前景黯淡，失業率掉頭向上，飯碗隨時不保咯喎，入市態度保守啲都好正常，之但係樓盤本身欠吸引力，亦係不爭嘅事實。講真，市建局重建項目不嬲爭議多多，「煥然壹居」又冇根據跌市調低價格，想搵人買都難。正如「東方報業民意調查」顯示，大部分受訪者直指「煥然壹居」折扣欠吸引力，定價脫離市場。
講起真係唔知好嬲定好笑，鬍鬚曾拒絕還富於民，一味派糖敷衍民意，美其名曰「反周期措施」，查實要講「反周期」，港府樓市政策先係表表者。當年亞洲金融風暴殺到，港府仲推出八萬五政策，加速樓市崩潰，間接觸發老董嘅「腳患」。曾爵士上台，經濟明明有所好轉，佢老哥一於少理，堅持少建公屋、停建居屋，導致樓價狂飆不止，無殼蝸牛望樓興嘆。好嘞，家陣經濟下行，樓市逆轉，港府一樣係無動於衷，坐等運到，連檢討「減辣」措施都唔肯。應做嘅唔做，唔應做嘅亂做，唔係「反周期」又係乜？大部分受訪者狠批港府房策官老爺渾渾噩噩，房策未能與時並進，證明市民眼睛係雪亮嘅。
港府處理樓市問題進退失據，章法全無，興建公屋亦係慢如蝸牛。依家公屋上樓平均輪候時間已經延長至三點九年，所謂「三年上樓」承諾早就淪為笑談。之所以搞成咁，港府拓土無方，建屋無能固然難辭其咎，更重要嘅係隨着社會變遷，三代、四代同堂家庭買少見少，核心家庭取而代之，愈來愈多年輕人及長者獨居，反觀公屋計分制十年如一日，同時代發展完全脫節，計分制屢遭司法挑戰，唔係冇道理o架！
一句到尾，市場瞬息萬變，施政當然亦應該審時度勢，一味墨守成規，以不變應萬變，唔撞大板至奇。煥然壹居銷情遭遇冷場，之唔係港府唔識變通、戇戇居居嘅縮影囉。