政情：公民講場：淡化解畫露底 陳章明「幾叻仔」

陳章明一上任平等機會委員會主席就連番甩轆，被揭發冇向當時任職嘅嶺南大學申報做其他學院嘅論文導師，涉嫌秘撈兼冇申報，之後解畫，點知愈解愈亂，最後要為表達唔好道歉。佢尋日出席電台節目時又再為事件次解畫，指當時係初次受訪，「經驗不足」所以表達得唔清楚，話從中「學到好多嘢」喎。點知佢轉頭又話自己成功獲委任平機會主席係「幾叻仔」，喺眾多候選人中脫穎而出代表有認受性。佢先後做過咁多個諮詢委員會嘅主席，仲賴經驗唔夠實在講唔過去，既然咁叻仔，點解又犯啲咁嘅錯呀？真係唔知笑好定喊好。