政情：歌王楊立門唔怕黎明「爭女」
黎明近期憑住出色嘅公關技巧，再次成為城中熱話，但唱歌出名動聽嘅「AO歌王」、民政事務局前常任秘書長楊立門尋日出席一個活動時，話自己唔係黎明嘅歌迷，冇欣賞佢嘅演唱會，但承認自己係黎明年代嘅人，大讚佢「好靚仔」。被問到自己當時喜歡嘅女生會唔會愛黎明，楊立門就話：「我鍾意嘅女仔鍾意黎明，都唔會話真係去嫁佢嘅，所以唔會妒忌嘅。」相當淡定！
楊立門嘅表演一向反應唔錯，佢提到依家只會喺公益活動獻唱，未來亦會考慮係咪開屬於自己嘅個人音樂會。
原來佢喺大約一個月前去咗四川西部同當地年輕人交流，佢話當地係「康定情歌」嘅地方，但佢冇喺嗰度公開唱歌，只係「自己同自己唱」，而受當地高原氣候嘅影響，佢都有高山反應，好彩當地只有海拔約四千多米，唔算太高，佢只係感到頭暈氣促，而喺當地亦緊記唔可以奔跑，過咗一日就適應嘞！