政情：「社運當課外活動」 朱經武講得輕鬆
二○○九年卸任科技大學校長嘅朱經武，自此較少喺香港公開現身，而時移世易，大專學界於多年後嘅風氣已經同當年一百八十度大轉變，今時今日本土派已成主流，以抗爭行動為主嘅表達意見模式基本上確立，唔少大專學生會代表更投身社運。朱經武尋日出席活動時罕有地開腔，苦口婆心話學生應以學習為主，搞社會運動當係課外活動就好。其實朱經武今日講得輕描淡寫，依家大專多間院校嘅管理層，相信對於學生投身社運，甚或係抗爭行動肯定係百般滋味在心頭。
學生睇唔通前景怨氣重
還記得朱經武於前年佔領行動發生前，曾經呼籲社會為校園留下安靜地，並指當年自己於科大嘅原則就係遠離政治，防止大學在政治傾軋中遭標籤，而事隔多年後，朱經武嘅一言一行都有當年想法嘅影子，佢語重心長指學生喺校園應以學習為主，對於依家年輕人怨氣重嘅原因，佢覺得係同睇唔通未來前景有關，就此呼籲政府同年輕人要互相多聽、多了解。
對於大專學界要求廢除特首校監必然制嘅浪潮，朱經武冇對此作直接評論，但意有所指引用美國當地學界嘅例子，指當地州長任當地大學校董會主席，亦有權委任校董會成員，認為如果運氣好，就會搵到合適嘅人選出任。
少返香港 怕敍舊會亂噏
值得一提嘅係，朱經武離開科大多年，自此遠離公眾嘅視線範圍，朱經武承認近年少咗返香港，笑言自己害怕同老朋友聚會時會亂噏。
估唔到朱經武離開咗香港學界呢個圈子多時，仍然明白一旦講錯嘢隨時會引起軒然大波嘅道理，這或者可以間接解釋，點解佢於科大任內都甚得師生，甚或學界尊重支持！