中環出更：何秀蘭自爆唔識國情
全國人大委員長張德江早前同包括四名泛民議員在內嘅十名立法會議員會面後，最近傳出有關方面正籌備安排全體立法會議員下月訪問深圳，當日有份出席會面嘅泛民會議召集人何秀蘭出席一個論壇，被問及如果成行希望會見邊個官員，她竟然自揭底牌唔識國情，但由頭到尾都冇正面回應，究竟想見中方邊啲官員。其實泛民議員連國情都唔認識，又如何開啟同中央溝通大門呢？
拒答想見邊個官員
外界有傳當局正籌備安排全體議員下月訪問深圳，何秀蘭稱會面本身冇問題，但唔應該只流於形式，因此要了解議程同有咩內地官員，先決定會唔會出席。當問及希望會見邊個官員，何竟然話唔識國情，同時好多香港人都唔知內地官員官階等，直言「我哋啲資料搜集要做好」。
而於論壇嘅後半部分，開放畀台下觀眾發表意見時，何秀蘭又被區議員發言嘲諷，當時深水埗區議員李梓敬發言質疑，何秀蘭會見領導人帶雨傘吊飾就當係抗爭，揶揄何「又要威，又要帶頭盔」，不如下次着黃色底衫就當抗爭，何回應時就死撐，李所屬嘅自由黨「抽水抽到冇嘢好講」。
卓妮