古人話︰「天地不和，陰陽不順，故致天傾地陷之應。」當年元順帝宮殿就係出現冧天花同地陷，冇耐果然畀朱元璋趕返蒙古鄉下。勢估唔到幾百年後嘅今日，「天傾地陷」一幕居然喺香港重演，真係唔到你唔信邪！
尋日之嘛，城市大學康樂樓內一個運動中心一幅面積約一千四百平方米嘅天花突然倒塌，最少三人受傷。一千四百平方米有幾大？標準泳池面積大約一千平方米，你話幾誇張嘞。睇番新聞圖片，現場頹垣敗瓦，儼如廢墟，唔知嘅仲以為係地震災場。最得人驚嘅係，出事地點上星期至舉行完考試，如果當時發生意外，分分鐘死得人多！
「天傾」固然得人驚，「地陷」同樣唔講得笑。大家應該記得日前觀塘爆地下水管，除咗出現「馬路噴泉」嘅都市奇觀，仲搞到地面下陷，連雙層巴士都吞得落。嗱，天傾地陷搞到元順帝冇鞋挽屐走，唔知今時今日有啲人睇到呢度，會唔會有得震冇得瞓呢可？
話時話，香港呢排頭頭碰着黑，怪現象接踵而來，點止天傾地陷咁簡單。農曆新年前本港出現俗稱「五星連珠」天文異象，當時有玄學家話本港將有動盪，結果話口未完旺角就爆發暴亂，磚頭石頭齊飛，真係打針都冇咁快見效。
當然喇，成事在天，但謀事始終在人，好似城大冧天花呢單嘢吖，你話係上天示警又得，你話係人禍亦無不可。有同學反映上星期考試時，曾經聽到有重物墜地聲，懷疑有天花組件小規模剝落，點知校方闊佬懶理，關人個關，卒之咪搞成咁囉。
講到反應慢九拍，出事至補鑊，城大拍埋港府，絕對係蚊髀同牛髀。假難民無惡不作，橫行霸道，搞到香港幾乎陸沉，正義傳媒鍥而不捨踢爆相關亂象，可惜港府好似借咗聾耳陳隻耳咁，係要等到問題一發不可收拾至肯死死地氣檢討難民政策。港產官僚大事做唔到，小事做唔好，簡單到紅雨警告下嘅上課安排，都有本事引發天怒人怨。最好笑嘅係，人稱「唔得掂」嘅教育局局長吳克儉又係例牌賊過興兵，話要優化相關制度喎。喂，香港又唔係第一年打風落雨，點解以前相安無事，偏偏係你老哥搞到一鑊粥呢？
漢代大儒董仲舒就講得啱嘞，「國家將有失道之敗，而天乃先出災害以譴告之，不知自省，又出怪異以警懼之，尚不知變，而傷敗乃至。」古時皇帝都識下詔罪己喇，今日香港黑氣沖天，災異頻仍，當政者反而自我感覺良好，一味吹噓所謂「政績」，唔止無知無覺，直頭無良無恥！