政情：泛民建制為拉布又互轟
立法會「拉布」令大量議程積壓，臨近會期尾班議員先至如夢初醒。尋日內務委員會就討論能否喺大會優先編配辯論時段，以就扶貧小組委員會報告進行辯論，內委會主席梁君彥（Andrew）就忽然「挑機」，話機會喺議員手中，要睇吓議員係咪拉布。此番言論就隨即「撻着」人民力量議員陳偉業（大舊）。
對於無啦啦被挑釁，大舊就即時反擊，鬧Andrew「狗噏當秘笈」，質問「咩叫拉布你識唔識？唔識自己學吓嘢，亂咁吠！」Andrew隨即運用主席權力，以行為不檢點為由趕走大舊，部分不滿Andrew嘅泛民議員亦都拉隊離場。雖然民主黨議員劉慧卿無離場，但都對Andrew睇唔過眼話︰「唔係拉布唔好亂講，扯起人哋啲火」，又建議立法會加會處理餘下法案及議案。
吳亮星稱加會「嘥氣」
不過，一班因拉布被罰坐過嘅建制派議員就質疑加會嘅成效，好似金融界議員吳亮星就話，如果要加會「冇理由左邊坐喺度，右邊唔使坐」，否則加嚟都「嘥氣」喎。其實如果建制派肯坐定定，泛民亦無法要求響鐘點算開會法定人數拉布，應該各打五十大板至啱。