政情：教聯會狂插吳得掂
今屆政府任期只餘下一年，回顧一眾官員成績表，蓋滿「黑豬」印，搞到民怨四起。當中教育局局長吳克儉（吳得掂）真係誇啦啦，除咗德育及國民教育科風波及小三全港性系統評估（TSA）搞到一鑊泡外，近期新鮮滾熱辣就係未有配合天文台紅雨信號而及時宣布停課，連累一眾學生慘變「落湯雞」。現時無論泛民或建制都對吳得掂深表不滿，就連親建制嘅香港教育工作者聯會（教聯會）都聲言不支持吳得掂連任！
「唔係要個局長嚟讀書」
教聯會會長黃均瑜尋日在傳媒茶聚上炮轟吳得掂，認為局長需要解決問題，仲話「依家唔係要個局長嚟讀書，睇幾多本書都冇用架」，擺明就是寸爆吳得掂以每月看三十本書而自豪。炮轟吳得掂又點止黃均瑜一個，連副主席蔡若蓮都開火：「我真係睇唔到有咩理由佢（吳得掂）要做多屆！」她稱，教育界的問題一向都多到數不盡，除了TSA，還有合約教師、學生情緒等問題。
未有督促教統會交報告
蔡若蓮批評，現時香港教育方面已過時及迷失方向，她認為局長作為頂層，應該要帶頭起動處理問題。她指出，以前教育統籌委員會（教統會）會就教育政策提交報告，但現時不知已有幾多年無提交報告，批評局長應該要督促教統會。雖然她與黃均瑜都狂轟吳得掂，但她講到明，不會放過吳得掂：「佢一日未落台，我一日都要佢做嘢」，「總之佢仲有一日出糧，佢都要做嘢」，這不是「有教無類」，而是不想吳得掂白逗人工。
正如本報早前報道，吳得掂早已被建制派邊緣化，無論大小活動或會議都好少預吳得掂出席，寧願邀請副局長楊潤雄頂上，加上教聯會都公開炮轟，講明不支持吳得掂連任，睇嚟真係神仙難救。不知吳得掂會否選擇睇少陣書，在餘下任期為教育界做番啲成績，攞番個尾彩呢？