中環出更：葉劉牽頭培育「現代張騫」
「一帶一路」發展策略成為城中熱話，好多人都關注點先可以把握機遇，其中新民黨立法會議員葉劉淑儀（葉劉）更牽頭成立海上絲綢之路協會（海絲會）添！海絲會喺今個暑假會大搞名為「張騫計劃」嘅大學生實習項目，提供一百一十一個名額，送學生去「一帶一路」沿線國家實習，尋日特別舉行咗個啟航儀式，葉劉就大讚呢班學生有冒險精神。
葉劉形容參加者非常優秀，反映香港年輕人唔係只顧打機、搞分離主義。佢之所以有咁嘅體會，係因為有一男兩女年輕人主動申請並獲得取錄去非洲吉布提進行實習。葉劉大嘆吉布提之行好辛苦，因為當地最高氣溫高達攝氏四十五度，所以大讚參加者捱得同勇敢。
容海恩諗起熱浪怕怕
海絲會青年機遇委員會副主席容海恩（Eunice）都經歷過熱浪體驗。Eunice去過澳洲墨爾本，覺得當地天氣好舒服，點知有次因公事飛去澳洲另一城市阿德萊德，短短三日旅程撞正四十度高溫嘅熱浪，認真唔好彩！依家Eunice諗番起都猶有餘悸，形容當時一離開冷氣地方就好焗好辛苦，不停咳，加上水土不服搞到大病一場，自此佢搭親飛機都一定戴口罩，防患於未然。
另一位副主席王家揚（Roland）就自嘲為井底之蛙，皆因去親旅行都係大城市，無乜特別經歷，所以希望去吓澳洲、非洲等可以接觸大自然嘅地方。
不過，佢大嘆工作太忙，睇怕都要明年先成事喇！Roland透露，今次計劃嘅參加者要過五關斬六將，其中一關要用流利廣東話、英文、普通話評論時事，所以佢謙稱學生語文程度比自己好。
卓妮