官司纏身嘅前特首曾蔭權爵士（曾爵士），不時都會偕同太太曾鮑笑薇高調出席公開活動，遇上政商界人士雲集嘅酒會更加唔會放過曝光機會。不過，聽聞曾爵士將缺席明晚舉行嘅全國人大委員長張德江晚宴，原因係要去英國睇眼科醫生喎。兩件事嚟得咁巧合，究竟曾爵士對眼咩事要特登飛去英國睇，唔通佢爵士嘅身份去宗主國睇醫生有優待？
據聞曾爵士早已預約睇呢位眼科醫生，如果臨時取消預約，分分鐘要重新再輪候，所以最終決定放棄晚宴，飛去英國睇醫生。
其實香港嘅眼科診所成行成市，點解曾爵士要咁大費周章，花咁多錢買機票，專程飛去英國做檢查呢？唔通佢憑住爵士嘅身份去宗主國睇醫生有優待？抑或佢覺得香港嘅眼科醫生唔夠英國嘅咁好？真係一個謎！
呢個舉動睇起嚟好騎呢，但諗深一層，曾爵士醜聞不絕，依家又官司纏身，睇怕佢都係搵個藉口離開香港避見領導人，唔通仲留喺香港丟人現眼咩！