立法會議員一直要求增加議員償還款額，畀佢哋請人進行研究支援服務，但負責議員酬金及福利嘅行政會議成員、立法會議員及政治委任制度官員薪津獨立委員會，就建議由立法會秘書處運用其資源提供基本研究支援，話咁樣較向個別議員提供更有成本效益喎。立法會行政管理委員會尋日開會，決定由秘書處推行半年先導計劃，每個月提供兩個研究名額，但最終係冇議員用，抑或議員爭崩頭要用，搞到順得哥情失嫂意，就要睇吓發展喇！
立法會行管會主席曾鈺成話由下屆議會開始，即係今年嘅十月至明年四月，會推行半年嘅先導計劃，秘書處會按議員要求，每月可以提供兩個研究項目，雖然佢哋暫時用現有資源進行，但將來都希望可以有額外資源，兼且延續落去。至於點樣決定先後次序，佢就話遲啲會有指引，如果少人用就冇問題，就算多人用，或者議員要求研究項目都唔差幾遠，可以一併研究喎。
另外，由下屆立法會開始，立法會大樓向傳媒發出採訪證時，唔會區分傳媒性質，無論係電子、印刷或是網媒，只要係合法註冊團體，主要從事新聞報道嘅業務，兼且喺立法會大樓採訪期間有原創報道，即可獲發大樓嘅通行證。