政情：峯鴿得罪黨友 擺和頭早餐
民主黨（白鴿黨）中西區區議員許智峯（峯鴿），因為行為激進，惹起黨友不滿，質疑佢博出位，而早前又同黨友莊榮輝被指有內部矛盾，有指佢哋兩個各自代表派別，因此導致不和。峯鴿昨日向傳媒透露昨早已同莊榮輝、楊森等中西區黨友邀約食早餐，似乎擺「和頭早餐」意味甚濃！
仲記得峯鴿出道時，喺一四年中西區區議會討論使用二十五萬元公帑推動政改，但佢發現申請撥款嘅機構同部分建制派議員有關係，期間佢又不滿意小組主席裁決，靜坐抗議時被保安抬離場，隨即「一抬成名」。但佢嘅激進抗爭手法，就惹起區內黨友不滿，有指區內「老鴿」例如區議員鄭麗琼、甘乃威等，對其行為均不以為然，亦令佢喺中西區黨團內樹敵。
自稱素有傾談 力爭支持
唔通峯鴿突然醒覺，自知平日得罪人多，所以低聲下氣擺「和頭早餐」？佢就話一直都有同黨友傾談，今次亦都唔係首次同佢哋食早餐等工作食飯，但承認今次係佢主動邀請莊榮輝等八至十人，一齊去莊經營嘅社企日本餐廳食早餐。佢仲話陸續會同東區及南區支部黨員食飯，力爭黨友支持。
老實講，連楊森呢啲「老鬼」都動員到嚟食埋一份，似乎係要黨內大佬擺平雙方矛盾，但係咪一餐早餐就可以擺平內部矛盾呢？抑或係反效果，被批評搵大佬壓人而愈走愈遠、愈鬧愈僵呢？咁就要放長雙眼睇嘞！
紮營抗改建 昨到期撤離
另外，早前因為政府打算將堅尼地城加多近街臨時花園改建為私人住宅用途，峯鴿喺花園內發起「保衞加園．留守三十日」行動，尋日到期撤離花園。由於城規會即將討論更改土地用途，佢早前已於城規會所在嘅北角政府合署紮營留守一晚，先試一試環境，似乎佢打算將紮營戰地轉場，未知呢次留守，會唔會可以推倒方案，抑或又得罪黨友呢？