中環出更：醫委會改革「硬推」 蔡堅怒劈炮
政府就醫務委員會改革提出增加四個委任業外委員，令醫學界嘅爭議不斷升溫！繼史泰祖決定辭任醫學會會長之後，一直反對政府建議嘅蔡堅尋日都嬲到遞信，辭去醫委會初級偵訊委員會主席一職。蔡堅話不滿政府未掌握事實背景就「硬推」草案，與其改革之後都會畀人鬧審得慢，索性劈炮好過食死貓。
稱唔接受「偽草案」
蔡堅話尋日下晝出席醫委會初級偵訊委員會會議後，已向醫務委員會主席劉允怡遞信請辭，即日生效，仲將辭職信畀埋立法會法案委員會。內容點名唔認同食物及衞生局常任秘書長，大力推銷增加四個委任業外委員，會將研訊時間由五十八個月減至廿四個月，更形容有關講法係「造假」，佢決定唔再參與呢場遊戲。
佢又暗示，有泛民議員認為醫學界應「袋住先」，之後再修改：「呢啲議員曾要求我哋（醫學界）政改中保持堅定。」佢表明堅拒接受「偽草案」。被問到有冇進一步行動，佢就話自己六十七歲，無力上街或「掟磚」抗爭，但若政府一意孤行，後果自負。
至於史泰祖就話自己都被捲入爭議漩渦內，但自己「不在其位」，唔評論蔡堅做法，但尊重佢決定。佢又慨嘆就醫委會改革，醫生業界出現唔同睇法；公眾同醫學界又有唔同睇法，但佢覺得大家都想醫委會好，希望互諒互讓。
卓妮